Shoqata Unioni Rinor i Kosovës, anëtare e Unionit Federal të Nacionaliteteve Evropiane (FUEN), mori pjesë në Forumin e 10-të Evropian të Rajoneve të Pakicave, i mbajtur në Chur të Zvicrës, ku u përfaqësua nga Sevgi Buş Kika, këshilltare e Zëvendëskryeministrit Fikrim Damka dhe anëtare e shoqatës.
Forumi i këtij viti u organizua me temën “Pakicat dhe Inteligjenca Artificiale – Rreziqet dhe Premtimet”, duke trajtuar të ardhmen e gjuhëve të pakicave, ndikimin e inteligjencës artificiale mbi komunitetet, si dhe mundësitë dhe sfidat që sjell epoka digjitale.
Në forum, i cili mblodhi përfaqësues, ekspertë dhe organizata të shoqërisë civile nga vende të ndryshme, u prezantuan punët dhe aktivitetet e zhvilluara nën udhëheqjen e Zëvendëskryeministrit të Republikës së Kosovës për Çështje të Komuniteteve dhe Bashkëpunim, Fikrim Damka. Gjithashtu u ndanë qasje dhe praktika në drejtim të mbrojtjes dhe avancimit të të drejtave të komuniteteve, si dhe ndërtimit të një shoqërie gjithëpërfshirëse ku secili ndihet i barabartë, i lirë dhe i sigurt.
Gjatë forumit u theksua rëndësia e ruajtjes dhe promovimit të trashëgimisë gjuhësore dhe kulturore në mjedisin digjital, duke vlerësuar njëkohësisht mundësitë e reja që inteligjenca artificiale ofron për komunitetet pakicë.
U nënvizua gjithashtu rëndësia e vazhdimit të përpjekjeve për rritjen e dukshmërisë së komuniteteve në platformat ndërkombëtare, ruajtjen e identitetit kulturor në botën digjitale dhe transmetimin e tij te brezat e ardhshëm.
